【羅婉玲廣州直擊】一年一度的《勁歌王總選頒獎禮》前晚在廣州隆重舉行，郭富城奪至尊級大獎「勁歌王上王」外，更一口氣囊括五個獎成全晚大贏家，且獲大會特別優待，凸顯地位超然。而英皇旗下歌手亦空群出動連掃十六個獎，有如英皇晒冷騷一樣，成績彪炳。
頒獎禮前晚舉行，英皇旗下歌手如容祖兒、Twins、鄭希怡、吳浩康、達明一派、關智斌、李逸朗、蔣雅文和本在橫店拍戲的謝霆鋒均盛裝出席，他們聯手為英皇共奪十六個獎，祖兒更奪「勁歌后」大獎，成女中豪傑。
城城因貴為「勁歌王上王」的得主，又是全晚大贏家，獲大會安排一間成千呎的冷氣貴賓房，又有六位保安貼身照顧兼開路，排場十足。城城在台上領獎時，掀起全場高潮，更以舞蹈答謝歌迷。對於獲大會禮待，城城謙虛表示：「都係大會安排，我廣州想見歌迷！」日前有指唐季禮開戲挽救人氣下滑的藤原紀香，城城力撐緋聞女友說：「我絕對唔覺得紀香人氣下滑，好多藝人到某個階段就會轉型，好似出書同做主持咁，大家唔好亂寫！」
霆鋒與賊絕交 而早前霆鋒在家被盜去一張已簽名但無銀碼的支票，差點被轉帳五十萬元，霆鋒被問到事件始末時表示：「唔再追究，知道佢係咩人就得！」霆鋒指事件在幾年前發生，事後已跟盜竊者「絕交」，他說：「佢係幕後人，所有朋友知係佢就得，唔想多講！（點解唔問佢係咪需要幫忙？）佢已經破壞友誼規則。」
至於被張芝經理人踢爆他偷偷從地道入醫院探芝並送上平安符，霆鋒淡然說：「我身為當事人都唔記得，但唔覺有地道喎！（咁你點探芝？）上囉！（光明正大？）我泊埋車添！」而祖兒對於今次奪得「勁歌后」大獎表示感到榮幸，更笑言望「年年有今日」。